Kā ka luna hoʻoponopono nota: Unuhi ʻia na Ākea Kahikina. Click here to read this article in English.

Ua hoʻomaka kekahi o ko Hawaiʻi mau hui ʻinikua nui loa e hoʻomalu aku ana i nā hana moʻomeheu Hawaiʻi ma ke ʻano he hana e hoʻomalu ʻia. 

ʻO AlohaCare, ʻo ia hoʻi ka mea nānā e lawelawe aku i nā kānaka ma lalo o Medicaid a me Medicare, a ke mālama aku nei ia hui i ka hoʻoponopono, ka lomilomi, ka ʻai pono a me ka hula no ke kākoʻo ʻana i kēia mea āna e kapa aku ai “he mālama ʻokoʻa i ke kanaka a me ke olakino me ka hana pū ʻana me nā kāhuna lapaʻau o ke kaiāulu.”

Ua manuahi kēia mau hana i nā lālā he 83,000 o AlohaCare. ʻO Ke Aloha Mau ka inoa o ka polokalamu, ka mea i hoʻomaka ʻia i kēlā kau hāʻule lau aku nei, a ke hoʻolaha ʻia aku nei ma ka pae ʻāina. 

Ke hana pū nei ʻo AlohaCare me nā kikowaena olakino kaiāulu a me nā ʻŌnaehana Mālama Olakino Hawaiʻi no ka hoʻokō ʻana i kēia mau hana. 

He hoʻopuoho ka wā maʻi ahulau nāna i kuhi pono i nā hakahaka ma nā hana lawelawe a me ka pono i nā alahele ʻē aʻe e mau aku ai ke olakino o nā kānaka, wahi a Francoise Culley-Trotman, ka luna hoʻokō o AlohaCare. 

Ua hoʻomaka ʻia ka hoʻolālā ʻana i ka papahana ʻo Ke Aloha Mau ma ka makahiki 2020, ka makahiki mua o ka wā maʻi ahulau, ka makahiki “e maopopo leʻa ai iā kākou ka ʻāʻumeʻume ʻana ma ka hoʻokō ʻole ʻia ʻana o nā pono liʻiliʻi.” 

Ua mālama aku ka hui i mau hālāwai hoʻolohe a loaʻa mai ka ʻike mai nā lālā o AlohaCare, a ʻo ka makemake nui o ua mau lālā nei, ʻo ia nō ko AlohaCare hoʻololi ʻia ʻana no ka hoʻomalu ʻana i nā hana mālama olakino i hoʻokahua ʻia i ka moʻomeheu. 

ʻO kekahi o kēia mau hana, ʻo ia nō ka hoʻoponopono, he hana lapaʻau Hawaiʻi nō ia nāna e hoʻoikaika aku ana i nā pilina ʻohana ma o ka hoʻoponopono ʻana i nā hihia o nā kōkoʻolua a me nā lālā ʻohana a me ka hoʻākāka ʻana i ka ʻōlelo ʻana. Ua pili hoʻi nā kūkākūkā i nā pule no ka hoʻoponopono ʻana i nā pilina a me ka hoʻonā ʻana i ka ʻeha i loko o ka ʻohana, wahi a ke kahua pūnaewele a AlohaCare.

ʻO kekahi hana ʻē aʻe e mālama ʻia nei e AlohaCare, ʻo ia nō ka hula. He hana ia e hōʻoniʻoni ʻia ai ke kino, a wahi a ka noiʻi, he hana ia e hoʻoikaika i ka ʻōnaehana kūpalehia, e hoʻēmi i ka piʻi koko, e hoʻōla i ke olakino noʻonoʻo a loaʻa mai nā makepono ʻē aʻe. 

ʻO ka lomilomi, he hana ia nāna e hoʻomālō aku a hoʻopololei i ke kino a e hoʻēmi i ka ʻaloʻahia. A, ʻo ka ʻai pono, ʻo ia nō ka hana i pili i ka ʻai ʻana i nā meaʻai kūpono i ulu a hoʻomākaukau ʻia ma kēia ʻāina nei. 

I ka makahiki 2020, ua kālele kekahi hōʻike a ke kula lapaʻau ʻo John A. Burns School of Medicine o ke Kulanui o Hawaiʻi, he pono nō nā polokalamu moʻomeheu no ka hoʻoponopono ʻana i nā kaulike ʻole ma ka pae he pilikanaka a he olakino ma ka lāhui Hawaiʻi.

Ua kālailai ia hōʻike i ka ʻikepili nāna e hōʻike aku ana, he pākolu ka nui o nā Hawaiʻi e pilikia ana i ka maʻi puʻuwai, ke kūhewa, ka maʻi ʻaʻai, a me ka mimikō ma luna o nā lāhui ʻē aʻe. 

Ua hōʻike ʻia mai hoʻi ka noiʻi i hōʻoia ʻia i ka ʻike hopena, e polapola ana ke olakino o nā Hawaiʻi ke hoʻokahua ʻia ka hana mālama ʻana i ka moʻomeheu Hawaiʻi. 

Wahi a Sheri Daniels, ka luna hoʻokō o ka ʻaha waiwai hoʻopuka ʻole ʻo Papa Ola Lōkahi, ke hāʻawi aku nei ʻo AlohaCare i “kekahi manawa kūpono no nā kaiāulu a me nā kamaʻāina” e hoʻomalu aku ai ka ʻinikua i nā hana Hawaiʻi nāna e hoʻopili i “kekahi o ko kākou mau loina a lawena.” 

ʻO kekahi o nā kikowaena olakino Hawaiʻi nāna e hana aku ana i kēia mau hana, aia nō ia i Waimānalo ma ka ʻaoʻao hikina o Oʻahu, a ʻehiku ona limahana e noho me he kāhuna lapaʻau lā. 

Ua hoʻomohala aku ʻo Waimānalo Health Center i kāna polokalamu lapaʻau moʻomeheu ma ka makahiki 2015 me ka hai ʻana iā Kumu Leinaala Bright, ka luna o ko ke kikowaena hui hana moʻomeheu no ke olakino. 

Lawe mai kēia kahuna lapaʻau Hawaiʻi i 30 mau makahiki o ka ʻike lomilomi. Mālama ʻo ia i nā papa like ʻole, e laʻa me ka papa lāʻau lapaʻau. 

Ua lanakila nō kēia mau polokalamu i pili i ka lapaʻau kuʻuna, wahi a Bright. 

Ma muli o ka hoihoi nui, ua hoʻomohala aku ʻo Bright i kekahi pūkaʻina o nā polokalamu hoʻonaʻauao, e laʻa ʻo Laws of Ola, Papa Lāʻau, a me Mahi Lāʻau Lapaʻau.

ʻO ka pahuhopu, ʻo ia nō ke aʻo ʻana aku i ka lehulehu i ka hana e pono ai ke olakino a me ka mahi ʻana i nā lāʻau no ka lapaʻau ʻana i nā maʻi like ʻole. 

Hoʻohui kēia mau hana i ka lapaʻau haole a me ka ʻike ʻōiwi, a ua ulu aʻe nō ka hoi i loko o nā kānaka e hulikua aku ana i ke keʻena o ke kauka. 

“Nui ka lapaʻau a me ke kōkua ʻana,” wahi a Bright. 

Aia hoʻi kā AlohaCare polokalamu ʻo Ke Aloha Mau ma ke keʻena ʻo Hui Ke Ola Pono ma Maui a me ke keʻena ʻo Hui Mālama Ola Nā ʻŌiwi ma Hilo ma ka Moku o Keawe. 

Ke hoʻomohala aku nei ka hui i kēia polokalamu ma Kōkua Kalihi Valley, Waiʻanae Coast Comprehensive Health Center, Hāmākua-Kohala Health Center, Hoʻōla Lāhui Hawaiʻi (Kauaʻi Community Health Center) a me Hawaiʻi Island Community Health Center.

ʻO kā Civil Beat kūkala nūhou ʻana i pili i ke olakino kaiāulu, kākoʻo ʻia e Atheron Family Foundation, Swayne Family Fund of Hawaiʻi Community Foundation, Cooke Foundation, a me Papa Ola Lōkahi. 

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.