Summer Fun: Pehea Ka Lōʻihi O Ka Papa Inoa Kūkali Ma Kou Kaiahome?
Nui lehulehu ka poʻe hoihoi i nā papahana kauwela o Honolulu, aia nō naʻe he mau hakahaka ma nā papahana ma ʻEwa a ma Kona he ʻelua pule ma hope o ka hoʻomaka ʻana o ka wā kākau inoa.
Ka nota a ka luna hoʻoponopono: Unuhi ʻia na Kamalani Johnson. Click here to read this article in English.
He hōʻea mai koe o ke kauwela, a hōʻea pū mai ka wā e ʻimi nui ai ko Hawaiʻi mau ʻohana i ka mālama keiki i ka wā e hoʻomaha ana ke kula no ka ʻeiwa pule.
ʻO kekahi ala makemake nui ʻia ko ke Kūlanakauhale a Kalana o Honolulu mau papahana Summer Fun i noa i nā keiki ma waena o nā makahiki 6 i ka 12. Holo nā papahana mai kinohi o Iune i ka pau ʻana o Iulai ma nā pāka kūlanakauhale a mālama ʻia nā haʻawina like ʻole e laʻa ka pāheona, ke mele, a me nā huakaʻi pū kekahi.
No kekahi mau ʻohana, he ʻāʻumeʻume nui ka loaʻa o ko lākou wahi ma ka pāka kaiahome.
I kēia kauwela, ke hoʻolālā nei ke Kūlanakauhale i ka hoʻoholo he 57 wahi e lawelawe ana he 9,575 mau keiki inā loaʻa nā limahana a pau. Ma kahi o ka ʻelua pule ma hope o ka wā i hoʻomaka ai ke kākau inoa, ua ulu nā papa kūkali a he 1,490 mau keiki.
ʻO nā pāka o Honolulu Hikina nā pāka nui loa o kona wahi e lawelawe ʻia aih e 2,425 mau keiki, a ma hope mai nā wahi o Honolulu Komohana mai Makiki i ʻAiea. He $125 o ke keiki ka uku mālama keiki no kēia mau papahana ma ka nui loa.
Mai ka Poʻalua mai, he mau papa kūkali ma ke 31 wahi e holo ana mai ka ʻekolu i ka 100 a ʻoi keiki. Aia he mau noho hakahaka ma nā wahi he 26 e koe ana, a ʻo ka papahana o Kalanianaʻole Pāka ka papahana nona nā noho hakahaka he nui loa: he 130. Ma hope mai ʻo Waiʻanae Pāka nona ka 120 noho hakahaka.
Ua ʻōlelo ko ke Keʻena Pāka a Hana Nanea ʻelele ʻo Nate Serota, ʻaʻole nō piha nā noho hakahaka a pau ma nā wahi a pau ma muli o ka nele i nā limahana ʻole. Aia ke ʻimi nei ke kūlanakauhale i nā limahana no ke kauwela, wahi āna, a e hiki nō ke ʻae i nā keiki mai ka papa kūkali i ka wā e hai ʻia ai nā limahana hou aku.
I laʻana, he 70 keiki ka lōʻihi o ka papa kūkali ma ka papahana kauwela ma Booth Pāka. Inā ua hai ia wahi he mau limahana hou aku e nui aʻe ai ka nui keiki e ʻae ʻia, e hiki nō ke ʻae ʻia he 60 keiki o ka papa kūkali. Wānana ʻo Serota i ka hai ʻana o ke kūlanakauhale ma kahi o ka 18 limahana no nā wahi ma Oʻahu Koʻolau a ma Honolulu Komohana.
He like ʻole ka hoihoi ʻia o nā papahana. Ua lilo koke nā noho he 350 o ko Mānoa Pāka papahana, a aia hoʻi i kēia papahana ka papa kūkali lōʻihi loa ma ka 157 keiki. E noho ana he 5 mile ka mamao mai kēia wahi, he 32 noho hakahaka o ko Pālolo Pāka papahana.
Ua piha koke ko Koko Head papahana i loko o kekahi mau minuke a he papa kūkali ma ke 79 keiki mai ka Poʻalua mai. He ʻelua paha pule a lilo nā noho he 125 o ko Kaimukī Pāka papahana.
ʻAʻole i hoʻohala manawa iki ʻo Nina Wood, he makua, ma ke kākau inoa i kāna keiki kāne he 12 ona mau makahiki ma ko Makiki Pāka papaha kauwela. I kinohi aku o kēia mahina, ua hōʻea mikiʻala ʻo ia i ka pāka he hoʻokahi me ka hapa hola ma mua o ka hoʻomaka ʻana o ka wā kākau inoa no Summer Fun i ka hola 5 o ke ahiahi, a ua kū laina me ʻehiku hou aku mau mākua.
I ko ka hapa nui o nā ʻohana kākau inoa ʻana i kā lākou poʻe keiki ma o ke kahua pūnaewele, ua hoʻoholo ʻo Wood e kākau inoa he alo a he alo no kona manaʻo e uku me ke kālā kūʻike. Ua ʻōlelo ʻo ia, ua koho ʻo ia i ko Makiki papahana no ke kamaʻāina o kāna keiki i ia wahi, a he kiʻowai ko ka pāka e leʻaleʻa ai nā keiki.
ʻAʻole nō maʻalahi ka ʻimi ʻana o nā mākua i nā ala emi e mālama ʻia ai kā lākou poʻe keiki i ka wā e hoʻomha ai ke kula, i ʻōlelo ai ʻo Wood, keu hoʻi no ka hoihoi nui loa ʻia o kekahi mau papahana.
“ʻO ia ka pilikia ma Hawaiʻi nei,” wahi a Wood. “Nui loa nā keiki, a ʻaʻole nō lawa nā koho.”
Mai ka Poʻalua mai, he ʻeono noho hakahaka o ko Makiki papahana.
Ua kōkua ko Civil Beat kākau moʻolelo ʻo Caitlin Thompson i kēia moʻolelo.
Kākoʻo ʻia ko Civil Beat’s mau moʻolelo hoʻonaʻauao na kahi haʻawina kālā na Chamberlin Family Philanthropy, a kākoʻo ʻia ʻo “Data Dive” ma ka māhele na ka Will J. Reid Foundation.
